Trygg utskriving av eldre pasientar frå sjukehus ved bruk av tiltakspakke (care bundle) og sjekkliste.

Oppsummering av prosjektet: Å skrive ut eldre pasientar frå sjukehus stiller store krav til kommunikasjon og samordning i helsetenesta. Pasienterfaringar og re-innlegging er indikatorar på kvalitet, og forsking viser at det er rom for forbetringar både når det gjeld innhaldet i tenestene. Vår hypotese er at innføring av ei tiltakspakke i kombinasjon med sjekkliste vil føre til auka etterleving av utskrivingsrutinar, redusert ikkje planlagt re-innlegging, og betre skåre når det gjeld pasienterfaringar. Aktiviteter i 2016 Januar- mars: Pilotprosjekt (delstudie 2) som starta ved to medisinske sengepostar i juni 2015 blei avslutta ved utgangen av mars. April-juni: Fokusgruppeintervju med helsepersonell frå sengeposten som deltok i pilotprosjekt. Handsame kvantitative og kvalitative data. Prosjektrapportering. Førebels resultat frå pilotprosjektet presentert på utvida leiarmøte ved Medisinsk avdeling. Presentasjon av phd-prosjektet for prosjektgruppe ved Kreft post 2, HUS og på workshop i samband med vitjing av samarbeidspartnar Nick Sevdalis frå Imperial College i London. August- desember. Kvalitetssikring av innsamla data for delstudie 1 og delstudie 2 Presentasjon av førebels resultat ved: 1) Prosjektgruppe ved Kirurgisk gastroavdeling; Stavanger Universitetssjukehus, 2) Sjukepleiesymposiet, Haukeland Universitetssjukehus (HUS), 3) Forskarnettverket i pasientsikkerheit i Helse Vest(presentasjon på engelsk), og 4) Seksjon for smertebehandling og palliasjon (HUS). Analysearbeid i samband med skriving av første artikkel. Førebels resultat frå pilotprosjektet Studien inkluderte studien pasientar over 65 år ved intervensjonsposten (n=219) og kontrollposten (n=311). Intervensjonen besto av eit utreiseplanleggingsverktøy i Meona, med ei tilhøyrande avsjekkliste før utskriving av pasientane. Prosjektet nytta kvalitetsforbetrings-modellen Plan-Do-Study-Act. Vi målte bruken av verktøya. Statistisk prosesskontroll blei brukt for å analysere prosessdata. Pasientane (n=1418) fekk spørjeskjema ein månad etter utskriving. Pilotprosjektet blei evaluert av legar og sjukepleiarar i eit fokusgruppeintervju, med innhaldsanalyse. Utreiseverktøyet blei brukt ved 42 % av utskrivingane, avsjekkliste ved utreise 32 %. Av pasientane, svarte 37 % på erfaringsundersøkinga. Måling av pasienterfaringar viste uendra skåre. Re-innleggingsrata viste reduksjon på 9,6 %. Deltakarane i fokusgruppeintervjuet var kritiske til vidare bruk av utreiseplanleggingsverktøyet, men stilte seg positive til fortsatt bruk av avsjekklista. Prosjektet ble opplevd som nyttig og det blei identifisert forbetringspunkt ein må justere før implementering av verktøyet. Spørsmåla i PES kan delast inn i fire dimensjonar: Meistring, Medverknad, Eigenomsorg og Etterleving av helseråd. Førebels resultat syner at dimensjonen Medverknad får lågast skåre. Pasientar som vert re-innlagde, skårar signifikant lågare på dimensjonane Meistring og Etterleving av helseråd samanlikna med pasientar som ikkje vert re-innlagde. Framdrift PhD-opplæringa er gjennomført med unnatak av eit studiepoeng. Forskingsprosjektet er organisert i 3 delstudier. Data til del1 og 2 er kvalitetssikra og analysearbeidet har starta. To viskaplege artiklar er planlagt. Delstudie 3 bygger på data fra studie 1 og 2 med tillegg av mellom anna kvalitative data.

Bakgrunn: Å skrive ut eldre pasientar frå sjukehus stiller store krav til kommunikasjon og samordning i helsetenesta. Pasienterfaringar og re-innlegging er indikatorar på kvalitet, og forsking viser at det er rom for forbetringar både når det gjeld innhaldet i tenestene og korleis ein evaluerer desse. Det er også behov for å utvikle standardiserte måleverktøy for pasienterfaringar knytt til utskriving. Ei rekke enkeltståande tiltak er sett i verk for å sikre kvalitet ved utskriving. Resultata kan truleg bli betre ved å bruke samansette tiltak («care bundle»), kontrollere etterleving ved bruk av sjekkliste og følgje opp med måling av pasienterfaringar. Prosjektet utvikler, validerer og implementerer metoder for å sikre god kvalitet ved utskriving av pasientar frå sjukehus. Metode: I delprosjekt 1 vil ein validere eit spørjeskjema om eldre pasientar si erfaring knytt til utskriving. Prosjektet inkluderer 289 menn og kvinner over 65 år innlagt ved Haukeland universitetssjukehus meir enn 24 timar. I delprosjekt 2 blir dei samansette tiltak og sjekkliste testa i ei pilot. Samansette tiltak vil vera strukturert utreisesamtale, samstemming av legemidlar og å kontrollere at pasienten har blitt kartlagt når det gjeld underernæring, risiko for fall og trykksår. Vidare at pleie og omsorgsmelding er sendt og at epikrise følgjer med når pasienten blir overført til institusjon. I delprosjekt 3 implementerer ein dei samansette tiltaka i fullskala og evaluerer innføringa med trinnvis, klyngerandomisert, kontrollert studie. Designet er særlig relevant der det er forventa at intervensjonen vil gjere meir godt enn skade og / eller der det av praktiske eller økonomiske årsaker ikkje er mogeleg å implementere intervensjonen samtidig til alle deltakarane. Resultat: Det er planlagt tre artiklar for publisering i internasjonale vitskaplege tidsskrift og deltaking på nasjonale og internasjonale konferansar/kongressar. Milepæler /aktiviteter: Delprosjekt 1. Førebels resultat: 289 pasientar over 65 år deltok. Gjennomsnittsalderen var 77,2 år (±7.4) år og 56% var menn. Deltakarane blei rekruttert frå ein ortopedisk post og fem medisinske postar. Resultata viser at spørjeskjema kan delast inn i fire dimensjonar 1) Mestring, 2) Involvering 3) Eigenomsorg og 4) Etterleving av behandlingsråd. Dimensjon 2, Involvering får lågast skåre, noko som indikerer at det største forbetringspotensialet for sjukehuset gjeld involvering av pasientar i samband med utskriving. Delprosjekt 2: Status: Det har blitt gjennomført tre timars kurs i strukturert utreisesamtale for tilsette med ansvar for utskriving. 42 av totalt 46 legar og sjukepleiarar ved pilotposten deltok på kurset. Tiltakspakke for å sikre trygg utreise er lagt inn i form av eit utreiseplanleggingsverktøy i ny kurveløysing (Meona). Verktøyet innheld ei sjekkliste som skal fyllast ut før pasient blir skriven ut. Utprøving starta 10.12.2015 og vil gå føre seg ut mars 2016. Delprosjekt 3: Blir planlagt på bakgrunn av resultat og erfaringar gjort i delstudie 2. Teoretisk del av Ph.d.-opplæring gjennomført, nokre formidlingspoeng gjenstår. Deltok i Forsker Grand prix 2015.